2020 Christmas pulrai hlan ah ttihnung tukmi Christmas a rak um bal

Khrihfa hna nih kan sunhsak ngaimi le kan i hngahhlang tuk tawnmi, khua le chungkhar kan hlam tawnnak caan le Thlarau lei ah kan i hrim tawnnak caan, Christmas cu kan hung phan cang. Asinain 2020 kum Christmas cu kum dang Christmas he aa lo ti lo.

Khua tlun duh zong nih tlun khawh a si ti lo i, pumhnak zong zalong tein tuah khawh a si ti lo. Lungthin hliphlaunak thil tampi cu an lotlau hna. A ruang cu vawlei pumpi ah Covid-19 pulrai a um caah a si. A poi ngai ngai.

Sihmanhsehlaw, vawlei tuanbia kan zoh tikah 2020 kum lawng hi vawlei pi nih pulrai lakah Christmas a son a ai ti lo. Tuanbia chungah a rak um bal cang.

1918-19 kum ah vawlei cung pumpi ah pulrai a rak tlung i a min cu Spanish Flu (influenza) avrak si.

Hi rai hi aa thoknak hmun taktak cu hngalh a rak si lo. Micheu nih United States i ralkap camp in aa thok tiah an zumh i, a cheu nih Tiluk ram in aa thok tiah an zumh.

Hi rai aa thok caan cu 1918 kum, March thla ah a rak si. Covid rai bantuk hin a voi khatnak, a voi hnihnak, a voi thumnak tiin a rak um ve. A voi khatnak cu 1918 kum March thla in September thla tiang a rak si. Hi chungah rai nih a phanhmi le rai in a thimi anvrak tam rih lo. September thla dihlei ah, atu Covid bantuk thiam hin, virus cu a phun aa thleng ve i, 1918 kum October thokin khulrang taktak in rai cu a karh i. Hi rai in a thimi dihlak hi minung 100 million hrawng an si i, cu vialte lak i cheuthum cheukhat cu 1918 kum, October in December karlak ah an rak thi. Atu bantuk hin sianginn le a dang mibu umnak hmun le caan vialte rak khar dih an si ve. Vawleivralpi pakhatnak a donghlei hrawng a si fawn i atu Covid nakin an rak harsa deuh. Ruak fimtawltu hmanh an rak ngwi tlamtling lo.

1918 kum Christmas le 1919 kum thar hrawng te hi pulrai a voi hnihnak le a voi thumnak aa thlen hrawng a si.

A voi thumnak cu, mioi nih an hun i nek dwuh cang i, cun a derthawm deuh cu an thi cang fawn caah, a karhning a rang ti lo i a thimi an tlawm deuh cang. January in March thla tiang a voi thumnak cu a caam nain a thimi an tlawm ngai cang. Hi rai hi 1920 kum March thla ah a dong tiin tuanbia ah hmuh a si.

Apanih Flu hlan ah pulrai fak bik hna cu Justinian le Black death hna an si. Black Death rai i a thimi le Spaniah Flu i a thimi hi an i tluk nawn nain, Black Death cu kum 50 dengmang chung a rak si i, Apanish Flu tu cu, a thimi an tambik caan cu, kum 1 lawng a si ko. Cucaah vawlei nih a rak tuar balmi pulrai lakah a fakbik pakhat a si tiah zumh a si.

Atu kan tuarmi Covid rai cu hnahnawhnak a kan pek ve rilmal ko nain, Spanish Flu sin ah cun chim awktlak a si rih lo.

Ahohmanh, Christmas siarem tein don khawh lo zongah, thachiat sing a si lai lo.

Be the first to comment

Leave a Reply

Your email address will not be published.


*