Fale cawnpiak tikah a herhmi phun 4 !

Bible nih “Ngakchia cu azulh awk asimi lam kha cawnpiak (chimhhrin, zulhter, theihter, hngalhter) law, a upat tikah mah cucu a pialtak ti lai lo” (Phungtlukbia‬ ‭22:6‬) tiah ati.

Fale nih zeitindah kan chimhmi hna hi an thinlung ah an isehchih khawh lai ti ahcun na fa kha a daihnak hmun ah kalpi law (eye contact) amit khan na mit kha izohter law hitihin biachim. “Ka fa Jesuh Khrih nih an dawt tuk. Na nulepa nih kan idawt tuk. Cucaah rak kan daw ve mu. Na kan dawt ahcun na nulepa nih kan duhlomi na tuah lai lo mu. Kan icawnpiakmi na ngaih lai mu. Hmailei nangmah caah an bawmtu an si. Kan ibochantukmi na si. Nangmah kan ingeih hi kan ilawmtuk” tiah awtlumtein na chimh i Bawipa sin ah thluachuah na halpiak ahcun khakha zeitikhmanh ah an philh kho ti lai lo. A thinlung tawne ah a caam zungzal lai.

Cun ngakchia na cawnpiak lio ah na hmurka kha biapitukmi asi caah hihi tuah khawh izuam.

1. Capo bia na hmang lai lo ( na capo ahcun biatak zong kha capo ah a ruah lai).

2. Aw hraang na hmang lai lo (na aw hraan ahcun aw nem/thlum kha a sawhsawh bia le zulh lo dingah a ruah lai).

3. Fung/hanger na hmanh lai lo (fung na hman ahcun ṭihnak angei lai i, fung lo paoh kha zeihmanh ah arel lai lo).

4. Na mithmai chiat le thinhaang mui na hmang lai lo ( khakha amah zong nih aa cawn ve lai. Dawtnak mithmai le bianem tu kha na hman lai).

Cun ka cawnpiakmi le ka chimhhrinmi hi a ngaihcawlh lai le a zulh cawlh lai tiah na ruat lai lo. Cun na cawnpiakmi zong a zul kho dih lai lo. Asinain a thinlung ah na cawnpiakmi a hram asih i anun kha abiapitukmi asi. Na cawnpiakmi ahram anun hlan tiang mahtikhan na cawnpiak zungzal lai. Cawnpiak cu nangmah rian asi i, a theipartertu cu Thiang Thlarau asi. Ka chimhmi le ka cawnpiakmi an ngai lo i tiah na ngol hrimhrim lai lo. Nifatin an caah thlacampiak hna. Invest tuah lakah a ṭhabikmi hi chawva asilo fale Pathian bia in ṭhanter hi an si.

Cu na cawnpiakmi le na chimhhrinmi an thinlung le ruahnak chungah a luh hnucun nifatin na chimhmi paoh kha nikhat hnu nikhat in ngaih an izuam lai i an zulh ko lai. Sualnak chungah an tlak sual hmanhah Bawipa nih a chuah ṭhan hna lai. Zeicahtiah na cawnpiaknak aw nih an thinlung le ruahnak le an hnathlam ahkhan a ven hna.

U.S kan umnak rampi hi sualnak in a khahnak asi caah kan fale hi kan daihthlanh hna awk aṭha ti lo. An no liote ah Jesuh Khrih he tonter hna usih! James Vanneilian

Be the first to comment

Leave a Reply

Your email address will not be published.


*