Thanchonak caah dawntu thil phun 5 hi hrial khawh i zuam ve

Minung a simi paoh nih thancho le hlawhtlin cu kan duh dih. Asinain, cu thanchonak le hlawhtlinnak cu kan biakmi khuazing nih van in kan hmai ah a hun thla lai lo i, ahohmanh nih kan ban in an kan hnuk fawn lai lo. Cu caah thancho le hlawhtlin a duhmi paoh nih kanmah tein kan virhkhawih le ka tuahtuan a herh. Thanchonak caah tuah dingmi thil tampi a um bantukin tuah lo dingmi (hrial/ suum dingmi) zong tampi an um ve. Asinain cu tampi a ummi lak ah a biapi ngaimi thil hrial ding (6) hna hi mifim nih an chim tam ngaimi a si caah, a tanglei ah hin ka hun in hrawmh hna.

1. Nuamhhnaihnak

Nuamhhnaihnak (party) a duh tukmi cu an thangcho bal lo tiah mifim nih an chim lengmang tawn. Kan chungkhar sining le rian ruat loin nuamnak paoh ah va tel peng i timh cu tinhmi (chun mang) phanh khawhnak caah dawntu nganpi a si.

2. Phaisa hman suum khawh lo

Phaisa tampi kawl khawh le hmuh khawh ko zongah a hman zia thiam lo le i suum khawh lo ah cun hlawh a tling kho lo. Phaisa zeimawzat hmuh paoh ah a hmannak ding tuaktan colh cu sifahnak a si.

3. A laarmi thil paoh ngeih timh ve

Kum khat hnu kum khat a laarmi thil (fashion zong) cu aa thleng peng lai i cucu ngeih na timh peng ve ah cun na kawlhawl mi phaisa nih an zat lai lo. A laar tharmi thil poah cu na caw cawk lai lo. Cuti na tuah ah cun innchungkhat khuasaknak ah chambaunak a tam lai.

4. Ralchiatnak

Tuchan vawlei kalning ahcun ralchiami cu zeihmanh kan ting ti lo. Thancho le hlawhtlin kan duh ahcun mi lakah kan i tenh ngam ve a herh i ton a herhmi minung kan ton ngam hna a herh. Thil tam deuh cu tuah hmasa phot an herh tawn. ‘Ka tlamtlinh lo sual ah’ tiin kan tih peng ahcun zeihmanh kan ngei lai lo.

5. Thathut

Thathu mi cun an sifak lai ti cu aho paoh nih kan hngalh dih ciomi a si ko. Bible ca hrimhrim nih thatumi cu a hua tuk hna. A poi khunmi cu, thathu mi paoh hi an or deuh i an holh zong a tam deuh fawn. Cun thathut hi Pathian tihzah lo pakhat zong a si. Zeicahtiah, Pathian nih pum tlamtling te a kan pek, thazang a kan pek i ngandamnak tha a kan pek ko a si ah cun, cu Pathian laksawng cu kan umpi sawhsawh ding a si lai lo; pawcawmnak ca ah le Pathian rian tuannak ca ah kan hman dingah Pathian nih a kan pekmi a si.

Be the first to comment

Leave a Reply

Your email address will not be published.


*