Thanchonak caah hrial hrimhrim dingmi ziaza phun 6

Minung a simi paoh nih thancho le nun nuamh cu kan duh dih cio. Asinain, cu thanchonak cu micheu nih saduh lawng kan than i kan i tiim tak tak lo. A cheu cu an i zuam ngai nain an hlawh a tling lo. A cheu cu an i zuam bantukin an hlawh a tling. Khrihfa sinak leikam in zoh ahcun zeizong vialte hi Pathian nawl le khuakhannak a si kan ti. Sihmanhsehlaw minung leikam in kan ngeihmi mawhphurhnak cu hlawt awk tha lo a si ve. Cucaah a tanglei ah hin, minung keikam mawhphurhnak le, thanchonak, hlawhtlinnak lam ah dawntu biapi bik ziaza 6 langhter an si.

1. I luklak/dukdak

Micheu cu thil pakhat (tuah awk/tuah lo awk tbk) kongah piangpai tein biakhiahnak kan tuah kho tawn lo. A tuah lai bang, tuah lai lo bang. A la lai bang, a chia lai bang in kan um tawn. Cuti luklak cun no lio, thazang that lio caan cu a liam thluahmah i, tar le derthawm nih a kan phanh colh tawn.

2. Rian chiah

Mitampi cu tuah kan duhmi le kan i timh komi zong “thaizing ah, hmaizah thokin, kumvui bak cu” tibantuk in kan um tawn. Cu nih cun zei poh a kan tlai ter dih tawn.

3. Capawl meikang bantuk ziaza

Micheu cu thokkhatlo ah kan lung a hung tho i hnamhnawh ngai in thil kan thok. A tluang ngaimi a hung lo nain, caan karlak ah harnak, tlamtlin lonak pakhat khat a hung chuah tikah kan tha a chia i ngol than kan hmang tawn. Lungtho ngai in cauk pakhat rel kan thok nain hmai 10 hmanh kan rel hlan ah kan zuam than ti lo. Lungtho ngai in weight tlawmter awkah exercise tuah kan thok nain ni 2/3 ah kan duhnak a ziam than. Cu bantuk cun sipuazi le biaknak zongah kan si. Cucaah kanmah bon lengmang.

4. Midang ralven

Mi ralven, mi hmaizoh hi thil tha a si i, khrihfa nunzia zong a si nain, hmaizohnak caan le ralvennak caan cu zohthiam a herh. Tahchunhnak ah, tlangval pakhat nih, nungak pakhat cu a duh. Asinain nungak hmai a zoh peng i a ral a ven peng ruangah a duhnak kong cu a chim ngam lo. Zeitik hmanh ah an kut an sih kho lai lo. Mi pakhat sinah thil pakhat hal na duh nain, “A siang bal lai lo” tiah hal loin na um peng ahcun, an pe ve bal lai lo; hal phot ko law an pek le pek lo kha na theih ko la. ‘Mi nih an ka al sual lai’, ‘mi nih an caw duh sual lai lo’ tibantuk te hnabin ruah peng ahcun zeihmanh kan tuah ngam lai lo i kanmah bon peng kan si ko lai.

5. Sonhtarhnak pek

Sonhtarh hi a poi tak takmi a si. Angai ngai tiah cun, sonhtarhnak nih a phichuak a thleng kho lo. Na sifahnak kongah sonhtarhnak tampi na pek khawh. Na sonhtarhnak pawl cu a dik ngaimi zong a si kho ko. Sihmanhsehlaw, na sonhtarhnak a that ruangah na sifahnak kha aa rumnak ah aa thleng hlwi lai lo. Thil pakhatkhat na tuah lomi ruangah sonhtarnak na tuah i a dik ngaimi a lo. Asinain na tuah lomi cu tuah lo a ai ko cang. Cucaah, tuah lonak a ruang le sonhtarhnak va pek lengmang nakin cun tuah phot kha a tha deuh peng.

6. Saduhthah lawng ; tuah hleng lo

Saduhthah (seihkuzin) cu a nuam tuk i i a fawite nain tuah taktak cu a har. Asinain seihkuzin nih zeihmanh a chuahpi tak tak lo. Na duh ngaimi ngaknu cu na seihkuzin chungah dawtnak bia na hei ruah i, amah zong nih a hei in dawt ngai ve i nan i nuam ngai. Asinain a tak tak a si lo. ” Cu cu ka tuah lai, cutin ka ti lai” ti lengmang tung i innchung lawng i benh peng ah cun kanmah bon peng kan si ko lai.

2021 kum chungah hi hi rak ruat hna law, “hei si kho te ning law” timi saduhthahnak pakhat khat na ngeih ah cun, zeihmanh nih in dawn hlah seh; sonhtarhnak lam kawl hlah, midang nih zeitin an hmuh ve hnga tiah i luklak hlah, thaizing le hmaizarh zong hngak hlah; atu bak ah khan raltha tein tuah phot ko. Tlamtlin le tlin lo cu Pathian cung le nangmah zuamnak cungah aa hngat ko lai. Na tlamtlin lo aual zongah midang soisel kha tih duh hlah.

Be the first to comment

Leave a Reply

Your email address will not be published.


*